ಆಧುನಿಕ ಕಾಲಘಟ್ಟದಲ್ಲಿ ಎಲ್ಲದರಲ್ಲಿಯೂ ವಿಶೇಷತೆ ಹಾಗೂ ವಿಭಿನ್ನ ಶೈಲಿ ಹುಡುಕುವ ಮಂದಿಯೇ ಹೆಚ್ಚು. ದಿನಬಳಕೆಯ ವಸ್ತುಗಳಿಂದ ಹಿಡಿದು, ಖರೀದಿಸುವ ಸೊಪ್ಪು ತರಕಾರಿಯಲ್ಲಿಯೂ, ವಾಹನ-ಬಟ್ಟೆ ಬರೆಗಳಲ್ಲಿಯೂ ಬೇರೆ ಬೇರೆ ವಿಶೇಷತೆ ಬಯಸುವ ತವಕದಲ್ಲಿ ಹೆಚ್ಚು ಹಣ ವ್ಯಯಿಸುತ್ತಿರುವುದು ವಾಸ್ತವ.
ಅಂತೆಯೇ ಇಲ್ಲೊಂದು ಕಡೆಯಲ್ಲಿ ತಲೆ ದಿಂಬಿಗೆ ಬರೋಬ್ಬರಿ 45ಲಕ್ಷ ಹಣ ಖರ್ಚು ಮಾಡಲಾಗಿದೆಯಂತೆ. ಸಾಕಷ್ಟು ಸಂಶೋಧನೆ, ಹಲವು ವರ್ಷಗಳ ಅವಿರತ ಪ್ರಯತ್ನದಿಂದ ಈ ದಿಂಬು ಹೊಸ ವಿನ್ಯಾಸ ಪಡೆದು ದುಬಾರಿಯಾಗಿದೆ. ನೆದರ್ ಲೆಂಡ್ ನ ಭೌತ ಚಿಕಿತ್ಸಕರೊಬ್ಬರು ನಿರ್ಮಿಸಿದ ಈ ದಿಂಬು ವಿಶ್ವದಲ್ಲೇ ಅತ್ಯಂತ ದುಬಾರಿಯಾಗುವುದರೊಂದಿಗೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ನೋಡುಗರು ಆಶ್ಚರ್ಯಚಕಿತರಾಗಿದ್ದಾರೆ.
ನೀಲಮಣಿ, ವಜ್ರ ಹಾಗೂ ಚಿನ್ನದಿಂದ ಅಲಂಕೃತಗೊಂಡಿರುವ ಈ ದಿಂಬಿನ ಜಿಪ್ ಗಳಲ್ಲಿಯೂ ವಜ್ರದ ಲೋಹಗಳನ್ನು ಇರಿಸಲಾಗಿದ್ದು, ಕುಬೇರನ ಮನೆತನದಲ್ಲಿಯೂ ಇಲ್ಲದ ಇಂತಹ ದುಬಾರಿ ಬೆಲೆಯ ದಿಂಬಿನ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಸುದ್ದಿಯಾಗುತ್ತಿದ್ದು, ತಲೆ ದಿಂಬಿಗೂ ಇಷ್ಟು ಹಣ ಖರ್ಚು ಮಾಡುತ್ತಾರೆಯೇ ಎನ್ನುವ ಪ್ರಶ್ನೆ ಸಹಜವಾಗಿ ಎಲ್ಲರನ್ನೂ ಕಾಡಿರುವುದಂತೂ ಸತ್ಯ.
