Yashaswini Anand : ಕಲಾವಿದರ ಡಿವೋರ್ಸ್ ವದಂತಿಗಳು (Divorce News) ವೈರಲ್ ಆಗುತ್ತಿರುವುದು ಹೊಸತೇನಲ್ಲ. ಆಗಾಗ ಈ ರೀತಿಯ ಕೆಲವು ಗಾಸಿಪ್ ಗಳು ಹರಡುತ್ತಲೇ ಇರುತ್ತವೆ. ಅಂತೆಯೇ ಕೆಲವು ವಾರಗಳ ಹಿಂದೆ ಮಾಸ್ಟರ್ ಆನಂದ್ ದಂಪತಿ (Master anand) ಯ ವಿಚ್ಚೇದನ ಬಗ್ಗೆಯೂ ಸುದ್ದಿಯೊಂದು ವೈರಲ್ ಆಗಿತ್ತು. ಈ ವಿಚಾರಕ್ಕೆ ಸಂಬಂಧಿಸಿದಂತೆ ಅಂದೇ ಮಾಸ್ಟರ್ ಆನಂದ ಪತ್ನಿ ಯಶಸ್ವಿನಿ ಮಾಸ್ಟರ್ ಆನಂದ್ ಈ ಗಾಳಿ ಸುದ್ದಿಗೆ ಬ್ರೇಕ್ ಹಾಕಿದ್ದು, ಮನಸೋಇಚ್ಛೆ ಕಮೆಂಟ್ ಹಾಕುವವರ ಚಳಿ ಬಿಡಿಸಿದ್ದರು. ಈ ಬೆನ್ನಲ್ಲೇ ಇದೀಗ ಯಶಸ್ವಿನಿ ಅವರು ಈ ಸಂಬಂಧ ಮತ್ತೊಂದು ಪೋಸ್ಟ್ ಅನ್ನು ಹಾಕಿದ್ದಾರೆ.
ಹೌದು, ಮಹಿಳೆಯೊಬ್ಬರು ಸಾಮಾಜಿಕ ಜಾಲತಾಣದಲ್ಲಿ ಮಾಡಿದ ಕಮೆಂಟ್ನಿಂದ ಮಾಸ್ಟರ್ ಆನಂದ್ ಹಾಗೂ ಯಶಸ್ವಿನಿ ಮಾಸ್ಟರ್ ಆನಂದ್ ಡಿವೋರ್ಸ್ ವದಂತಿ ಎಂದು ಎಲ್ಲೆಡೆ ಸುದ್ದಿ ಹರಿದಾಡಲು ಆರಂಭಿಸಿತ್ತು. ಈ ವಿಚಾರಕ್ಕೆ ಯಶಸ್ವಿನಿ ಮಾಸ್ಟರ್ ಆನಂದ್ ಪ್ರತಿಕ್ರಿಯಿಸಿದ್ದು, ತಮ್ಮ ಬಗ್ಗೆ ಸಲ್ಲದ ಮಾತನಾಡಿರುವವರಿಗೆ ಖಡಕ್ ಆಗಿ ಉತ್ತರ ಕೊಟ್ಟಿದ್ದಾರೆ. ತಮ್ಮ ಕುಟುಂಬದ ವಿಡಿಯೋ ಹಂಚಿಕೊಂಡಿರುವ ಯಶಸ್ವಿನಿ, ‘ದಯವಿಟ್ಟು ಗಾಳಿ ಸುದ್ದಿ, ವದಂತಿಗಳನ್ನು ಹರಡಬೇಡಿ. ನನಗೆ ನನ್ನ ಕುಟುಂಬ ತುಂಬಾ ಮುಖ್ಯ, ನನ್ನ ಕುಟುಂಬವೇ ನನ್ನ ಜಗತ್ತು. ನಾನು ಅದೇ ಜಗತ್ತಿನಲ್ಲಿರಲು ಇಷ್ಟಪಡುತ್ತೇನೆ’ ಎನ್ನುವ ಮೂಲಕ ತಮಗೆ ತಮ್ಮ ಕುಟುಂಬ ಎಷ್ಟು ಮುಖ್ಯ ಎನ್ನುವುದು ಯಶಸ್ವಿನಿ ವಿವರಿಸಿದ್ದು, ಗಾಳಿ ಸುದ್ದಿಗೆ ಬ್ರೇಕ್ ಹಾಕುವಂತೆ ಮನವಿ ಮಾಡಿಕೊಂಡಿದ್ದಾರೆ.
ಅಷ್ಟಕ್ಕೂ ಆಗಿದ್ದೇನು?
ನಟ ಮಾಸ್ಟರ್ ಆನಂದ್ ಪತ್ನಿ ಯಶಸ್ವಿನಿ ಅವರು ಇದೀಗ ಒಂದು ಕಮೆಂಟ್ ರಿಪ್ಲೈ ಮಾಡಿದ್ದು ಗಮನ ಸೆಳೆದಿದೆ. ತುಂಬ ವಿನಯವಾಗಿಯೇ, ತಾವು ಏನು ಹೇಳಬೇಕೋ ಅದನ್ನ ಸ್ಪಷ್ಟವಾಗಿ ತಿಳಿಸಿದ್ದಾರೆ. ಇತ್ತೀಚೆಗೆ ಯಶಸ್ವಿನಿ ಆನಂದ್ ಅವರು ಒಂದು ರೀಲ್ಸ್ ಪೋಸ್ಟ್ ಮಾಡಿದ್ದರು. ತೀರ ಚಿಕ್ಕದಾದ ಸ್ಕರ್ಟ್ ಹಾಕಿಕೊಂಡು, ʼಈ ಹಾರ್ಟಿಗೆ..ಏನಾಗಿದೆʼ ಎಂಬ ಹಾಡಿಗೆ ಡ್ಯಾನ್ಸ್ ಮಾಡಿದ್ದರು. ಯಶಸ್ವಿನಿ ಅವರ ಈ ರೀಲ್ಸ್ಗೆ ಅನೇಕರು ಒಳ್ಳೆಯ ಕಮೆಂಟ್ ಹಾಕಿದ್ದಾರೆ. ಅವರನ್ನ ಹೊಗಳಿದ್ದಾರೆ. ಆದರೂ ಒಬ್ಬಳು ಯುವತಿ ಸ್ವಲ್ಪ ಅಧಿಕಪ್ರಸಂಗತನದ ಕಮೆಂಟ್ ಮಾಡಿದ್ದಳು..ʼಶೀಘ್ರದಲ್ಲಿಯೇ ಇನ್ನೊಂದು ಡಿವೋರ್ಸ್ ಆಗಲಿದೆʼ ಎಂದು ಹೇಳಿದ್ದಳು.
ಯುವತಿಯ ಈ ಕಮೆಂಟ್ಗೆ ಯಶಸ್ವಿನಿ ಆನಂದ್ ತೀಕ್ಷ್ಣವಾಗಿಯೇ ಉತ್ತರಿಸಿದ್ದಾರೆ. ʼಮೇಡಂ..ಅದು ಎಂದಿಗೂ ಸಾಧ್ಯವಿಲ್ಲ. ನಾನು ನನ್ನ ಮಕ್ಕಳಿಗಿಂತಲೂ ಜಾಸ್ತಿ ನನ್ನ ಗಂಡನನ್ನೇ ಪ್ರೀತಿಸುತ್ತೇನೆ. ಇಂಥದ್ದನ್ನ ದಯವಿಟ್ಟು ಹೇಳಬೇಡಿ ಮತ್ತು ಇಲ್ಲಸಲ್ಲದ್ದನ್ನ ರೂಮರ್ ಮಾಡಬೇಡಿʼ ಎಂದು ಹೇಳಿದ್ದಾರೆ. ಅಷ್ಟೇ ಅಲ್ಲ, ಇಂದು ಅವರು ತಮ್ಮ ಇನ್ಸ್ಟಾಗ್ರಾಂ ಸ್ಟೋರಿಯಲ್ಲಿ , ʼತಾವು ಪತಿ ಆನಂದ್ ಅವರೊಂದಿಗೆ ಇರುವ ಹಳೇ ಫೋಟೋವನ್ನ ಹಂಚಿಕೊಂಡಿದ್ದಾರೆʼ. ಈ ಫೋಟೋ ನೋಡಿ ಕಣ್ಣೀರು ಬಂತು ಎಂದು ಕ್ಯಾಪ್ಷನ್ ಕೂಡ ಬರೆದುಕೊಂಡಿದ್ದರು.
